La Cartilla del Campesino
Si quierih ser campusino
prencipiaras con la siembra
siguiendu tó el procesu
jasta que llegui la siega
y estar en está dispuestu
pa dirti al cortí con juerza.
Pus, por lo menus tendras
que dir de ataor a ella
jaciendu ñus con el balagu
atandu la mies mu prieta
trujiendu agua a los hombris
de argún pozu que este cerca.
Tamien iras a l'era
y allí; montau en el trillu
jaras roangas enteras
jasta que'l granu y la paja
de tantu habel siu cortaus
andin, ca unu pol su cuenta.
Endispues bieni la limpia
si el vientu mos acompaña
aventaremus la parba
con los liendrus, con las palas
pa que asin de esta manera
se separin granu y paja.
El granu hemus de trael
en costalis aqui a casa
y vaciarlu en la trojí;
o meterlu aondi mos caba
esperandu a poel vendelu
a quien mejor mos lo paga
Acarrearemus la paja
con el carru acomulgao
llenandu a topi el pajal
pa que no farti al ganau
en los tiempus de inverna
aondi echar un buen bocau.
Aluegu no hay tantas priesas
se acabo el aginaero
unus dias, a cortar leña
pa jacer fuegu el añu entero
otrus, dandu güeltas pol hay
arreglandu desperfectus.
Otra vez bieni la siembra
y asin se repiti el cuentu
que facil es de aprender
mas de jacer, es bien cruentu.
... (ver texto completo)
