La Herencia
Dámaso, quieo hablalti
de una cosa seria
que quiciás, que quiciás no te gusti
porque sólo el pensalo da pena,
y yo sé que se va a moril presto
nuestra probi agüela;
porque asín me lo ijo antiel tardi
tío Celipi el "Pondera"
que ya sabes es el curandero
que tieni mas cencia
de tos estos pueblos
y de toas estas tierras.
Al salil del cuarto de tu probe madre,
le ije me dijiera
comu la encontraba,
y él, jadiendo muecas,
me dijo: "No sirvi, la vida
es como joguera
que el tiempo la va consumiendo
hasta que en ceniza güelvi toa la leña."
Tu señora ya haci tiempu
que tié la agonía mu cerca
y si va tirando
solu es por mi cencia:
pero no sirvin los muchos saberis
pa cural la vejés cuandu llega.
Ya haci algunos mesis
que te tengu dichu
que la probe vieja
de esti mes de Otubre
no se desenrea;
y hoy güelvo a diciltí
que en esta quincena
arregléis las cosas
que vos interesan,
que quiciás, que quiciás que vos pesi
si no andáis una miaja ligera,
porque yo, por la gracia que tengu,
aseguro que al vente no llega.
To estu me lo ijo antiel tío Celipi,
y yo te lo igo pa que mi concencia
no puea al dia mañana
ajogalmi transía de vergüenza;
polque sé que tu hermano Agapito,
a palrao con tu hermana la "Llesca"
pa vel si entre dambos
puen llevalsi el cerrao y la güerta
y a nosotrus poel engañalmos
con la viña y la vaca berrenda;
pero antis que ocurra to esto
si es que tú no tiés sangri en las venas
pa rompeli los morrus a alguno
han de vel quien es Marta la "Recia".
... (ver texto completo)
