La Colmena
Compadri Pericu:
¡Si vieras que negras
las pasamus Tíu Roqui y yo juntus
cuandu juimus a vel las colmenas!
Te aviertu que nunca
me gustarun a mi las abejas,
que por esu no tengu yo corchus
ni cosechu una pisca de cera.
Pero el lunis pasau
Tíu Roqui Cabrera
s'empeñó que nos juéramos juntus
a un asientu que está en las Corchuelas,
y llevamus toitus los trastis
pa castrallas si estaban ya güenas.
Allegamus; se pusu el Tíu Roqui
la su capilleja,
lo mesmu compadri
que una alambrera
y me dió a mí otra
animándumi d'esta manera:
-No juyas, Franciscu
aunque piquin de duru y depriesa,
que raspandu la manu en el corchu
pa qu'el cachu e rejón salga juera,
te queas tan frescu;
¡ni escuedi siquiera!
¡Juy compadri, que suoris m'entrarun
con aquella endiablá capilleja;
juy compadri, qu'ajinus, qu'ajogus
pa poelmi tapal la cabeza!;
y aluegu que tuvi
la careta puesta
tropezaba con toitus los rollus,
atrancaba con toitas las peñas,
y aquí qu'abodina
allá qu'endereda,
mediu tontu y molíu el tu compadri
llegó a la colmena.
El Tíu Roqui encendió un zajumeriu
pa que las abejas
entontás y ajogás con el jumu
del asientu a cien leguas se jueran,
y poellas castral mu tranquilus,
y traelmus la miel y la cera;
según piensu lo jidu a la contra
encendiénduli aquella jumera,
porque, ¡miá que venían abejinas
de toas partís a aquella colmena!;
Tíu Roqui me idía
que toas d'allí eran...
tan chiquinas, me paici mentira
que ca una su corchu se sepa.
Mientras tantu tenía yo las manus
bien metías en las mis faldiqueras,
que los vuelus y aquellus zumbius
que sonaban al pié las orejas
me tenían con los pelus en pinchu,
me tenían atontá la cabeza.
Cojimus un corchu
qu'estaba a una vera;
le arrancó Tíu Cabrera los viru
con la punta de una sitaera,
los pusu allí a un lau,
quitó la tapaera
y compadri...! lo mesmu, lo mesmu
me paicían las abejas que fieras!
¡Paici mentira
que jueran las mesmas
las que jadin aquellas casinas
tan bonitas de miel y de cera,
y que pican tan duru, tan rediu
si t'agüelin al pié e la colmena!
Tíu Roqui me diju:
¿No ves las abejas
comu andan por cima e las manus
sin picalmi un poquinu siquiera?
Pué que conozan al amu,
-le dijí-, que él anda con ellas;
peru yo l'había vistu
qu'en la corteda
de los corchus rascaba las manus
y tamién le vi' jadel muecas,
aunque na se pué idil que yo vía
enzonchau en aquella careta..,
A tó estu, barruntu una cosa
en el joyu el pescuezu, o mu cerca,
y al echal la manu
pa enteralmi qu'era,
me jincarun má e venti rejonis
las indinas de aquellas abejas!...
¡Juy compadri! ¡Qué saltus,
que ajinus, que brega!;
me pusi ñiervosu,
tiré la careta,
y roandu y tumbandu los corchos
pateé casi tóa la colmena,
y me jui corriendu
por aquella sierra
muchu más que una liebri
que la siguin los perrus de cerca...
Juy compadrí'.... qué indinas!;
me pusierun igual que una breva;
estaban rabiosas,
picaban mu perras...
y pueu dal gracias
qu'en el riu me planté de carrera,
y sín na, sin andal reparandu
en el Sitiu qu'era
me tiré a bañalmi.
jundí la cabeza,
naé jadia éntru,
salí jadia juera
y to se volvía refregalmi
las picas con el barru y la arena...
¡Juy compadri!. - Lo mesmu, lo mesmu
tenía las orejas
de jinchá como estén la morcillas
de bondongu que jadi tu suegra!...
¡Juy compadri!; ¡qu'ajogus!
¡qu'abejas mas perras!...
Ya pué venil el Tíu Roqui
preguntandu si voy a colmenas,
que le sueltu una fresca más grandi
que venti dejesas,
y le digu: a mi enjamás nunca
m'ha gustau el bregal con abejas;
por esu no tengu
ni media colmena;
el que quiera que vaya a castrallas
y me traiga la miel sin abejas.
Compadri Pericu:
¡Si vieras que negras
las pasamus Tíu Roqui y yo juntus
cuandu juimus a vel las colmenas!
Te aviertu que nunca
me gustarun a mi las abejas,
que por esu no tengu yo corchus
ni cosechu una pisca de cera.
Pero el lunis pasau
Tíu Roqui Cabrera
s'empeñó que nos juéramos juntus
a un asientu que está en las Corchuelas,
y llevamus toitus los trastis
pa castrallas si estaban ya güenas.
Allegamus; se pusu el Tíu Roqui
la su capilleja,
lo mesmu compadri
que una alambrera
y me dió a mí otra
animándumi d'esta manera:
-No juyas, Franciscu
aunque piquin de duru y depriesa,
que raspandu la manu en el corchu
pa qu'el cachu e rejón salga juera,
te queas tan frescu;
¡ni escuedi siquiera!
¡Juy compadri, que suoris m'entrarun
con aquella endiablá capilleja;
juy compadri, qu'ajinus, qu'ajogus
pa poelmi tapal la cabeza!;
y aluegu que tuvi
la careta puesta
tropezaba con toitus los rollus,
atrancaba con toitas las peñas,
y aquí qu'abodina
allá qu'endereda,
mediu tontu y molíu el tu compadri
llegó a la colmena.
El Tíu Roqui encendió un zajumeriu
pa que las abejas
entontás y ajogás con el jumu
del asientu a cien leguas se jueran,
y poellas castral mu tranquilus,
y traelmus la miel y la cera;
según piensu lo jidu a la contra
encendiénduli aquella jumera,
porque, ¡miá que venían abejinas
de toas partís a aquella colmena!;
Tíu Roqui me idía
que toas d'allí eran...
tan chiquinas, me paici mentira
que ca una su corchu se sepa.
Mientras tantu tenía yo las manus
bien metías en las mis faldiqueras,
que los vuelus y aquellus zumbius
que sonaban al pié las orejas
me tenían con los pelus en pinchu,
me tenían atontá la cabeza.
Cojimus un corchu
qu'estaba a una vera;
le arrancó Tíu Cabrera los viru
con la punta de una sitaera,
los pusu allí a un lau,
quitó la tapaera
y compadri...! lo mesmu, lo mesmu
me paicían las abejas que fieras!
¡Paici mentira
que jueran las mesmas
las que jadin aquellas casinas
tan bonitas de miel y de cera,
y que pican tan duru, tan rediu
si t'agüelin al pié e la colmena!
Tíu Roqui me diju:
¿No ves las abejas
comu andan por cima e las manus
sin picalmi un poquinu siquiera?
Pué que conozan al amu,
-le dijí-, que él anda con ellas;
peru yo l'había vistu
qu'en la corteda
de los corchus rascaba las manus
y tamién le vi' jadel muecas,
aunque na se pué idil que yo vía
enzonchau en aquella careta..,
A tó estu, barruntu una cosa
en el joyu el pescuezu, o mu cerca,
y al echal la manu
pa enteralmi qu'era,
me jincarun má e venti rejonis
las indinas de aquellas abejas!...
¡Juy compadri! ¡Qué saltus,
que ajinus, que brega!;
me pusi ñiervosu,
tiré la careta,
y roandu y tumbandu los corchos
pateé casi tóa la colmena,
y me jui corriendu
por aquella sierra
muchu más que una liebri
que la siguin los perrus de cerca...
Juy compadrí'.... qué indinas!;
me pusierun igual que una breva;
estaban rabiosas,
picaban mu perras...
y pueu dal gracias
qu'en el riu me planté de carrera,
y sín na, sin andal reparandu
en el Sitiu qu'era
me tiré a bañalmi.
jundí la cabeza,
naé jadia éntru,
salí jadia juera
y to se volvía refregalmi
las picas con el barru y la arena...
¡Juy compadri!. - Lo mesmu, lo mesmu
tenía las orejas
de jinchá como estén la morcillas
de bondongu que jadi tu suegra!...
¡Juy compadri!; ¡qu'ajogus!
¡qu'abejas mas perras!...
Ya pué venil el Tíu Roqui
preguntandu si voy a colmenas,
que le sueltu una fresca más grandi
que venti dejesas,
y le digu: a mi enjamás nunca
m'ha gustau el bregal con abejas;
por esu no tengu
ni media colmena;
el que quiera que vaya a castrallas
y me traiga la miel sin abejas.