La Cerveda
Yo enjamás nunca
probé la cerveda,
y aunque a mí me la den regalá
sin costalmi siquiera una perra,
que descuidin, que yo no la bebu;
que m'añurgu namás que de vella.
El agostu pasau
me juí a la feria
de Plasencia, pa vel las corrías
porque dijun qu'eran mu buenas,
que anque probi antoavía me gusta
si a manu se tercia,
echal unas canas al airi
y gastalmi unas cuantas pesetas
que aluegu en tó el añu
muchu tiempu quea
pa ganallas suandu y sufriendu,
p'ajorralas tostau en la siega.
Y estandu en la plaza
mirandu las tiendas
con tantu cacharru
que son sacaperras,
m'encontré con mi primu Pascasiu
y quiera o no quiera
s'empeñó y mos juimu a un casinu
y mi primu mandó trael cerveda;
y luegu enseguía
comu con priesa,
un mozu nos trajo dos vasus
y también dos botellas mu negras.
Cogió el sacacorchu,
estiró con juerza,
y estallarun lo mesmo que un tiru
que se tira con una escopeta.
Yo nunca había vistu
las botellas chiquinas de cerca,
peru yo t'aseguru
que la vés aquella
a mí me se olvía cuandu menus
cuatru mesis dispués que me muera.
¡Qué ansias m'entrarun
al probal la maldita cerveda!
Si m'escuidu provocu allí mesmo
de amargosa y de mala qu'era.
Dende entoncis, ya puén ofrecelmi
o idilmi que beba!
que digo mu claru
a quien me la ofreda,
que yo enjamás nunca
tragué la cerveda,
y anque a mí me la den regalá
sin costalmi siquiera una perra,
¡que descuidin!, ¡que yo no la bebu!,
¡que m'añurgu namás que de vella!
... (ver texto completo)
