La Loba
La tardi cahcaba en rosah.
En el colol, la mahá
Ehaba un halu de humu
De harah amelazáh
Que toítu lo hinchía
Del olol. El mayoral
En el jondu la cohtana
Hadía la corralá.
La mayorala en 'a puerta
Del chiberu, una chibá
Ía metel pa qu' el lobu
No le hidiera lobá.
Y mentrih, eha en el airi
Rehundil una toná.
Huyin lah úrtimah ludih.
Lah manuh amohináh
De lah sombrah enllenaban
El reol d' ehcuriá.
Huera, coplean loh bichuh
Y cudian la corralá
El Mohtagán, el Carichi,
El Caracol, el Pardal.
La Leona 'hta pariendu
Seih perrinuh tieni ya.
Drentu, al amol de la lumbri,
Mentrih hadi una tohtá,
Palra, a la muhel, el ombri,
Lah hechurah del rabán.
De repenti.
- ¡Cucha, chacha!
Ahuera ay algu. ¡Dagal
Échati huera! ¡bay, corri,
y péhcati la cayá!-
De golpi sali a la puerta
Y ya loh perruh ehtán
Engancháuh con treh lobuh,
Mentrih qu' otruh cuatru dan
Un manotadu a una obeja,
A l' otra, una mordihcá;
A l' otra, la dehpellehan;
A l' otra, quean derringá.
¡Hala con elluh loh perruh!
¡Enga, Caracol! ¡Pardal,
Hala con'a loba coha!
¡Arrempuha, Mohtagán!
¡Alantri, Carichí! ¡Toba!
¡Hala loh perruh! ¡Dagal,
Arrejunta lah obehah,
Lebanta la corralá!
¡Alantri, perruh, alantri!
¡Lobuh cabronih, atrah!
Mentrih el pahtol gañía,
Hartu 'e gahpaleal,
Harreaba cacheraduh
Briegandu con 'a maná
Hahta hadeluh huyil
A toh a la ehperdigá.
La flama d' una chamuhca
Le daba lu pa cuental.
Bido sieti manirrotah,
Deciséih ehpelleháh,
Benti muertah y entri ellah
La Mansa, La Resalá,
La Retozona, La Ehtrella,
La Biciosa, La Cansá.
Eharretáu güelbi un perru,
La leona, mordihcá.
Atiehtaíta de sangri
Tray la molla el Mohtagán.
- ¡Amuh, Caracol, Carichi,
Mih cohonúh, a runchal
Allí a la mehma guaría
Andi loh lobuh ehtán;
Qu' en el horcón de la choda
Bo' loh tengu qu' ahorcal!
Al rayal el día llega.
Da en el chodu a l'arbolá.
Del jopu tray arrahtrandu
Un lobu y, en un cohtal,
Trayía cíncu lobinuh
Qu'en el horcón b'ahorcal.
... (ver texto completo)
