LA NADA.-Los asturianos atraémonos como los imanes, pero solo fuera de casa. En casa, reaccionamos con repulsión a cuasi cualquier proyectu colectivu. Y nun ye d'agora, para midea, pero cuanto más tiempu vamos dexando pasar, más nos urxe abandonar esa constante histórica y tender puentes. O eso o nada. Claro que, vista de cerca, la nada tien el so aquello, dixiome el miu colaciu, Xandru: La nada nun risque nengùn esfuerzu, nun pide por caltener la mirada alta y la intelixencia en fierros.. La nada ye atractiva porque nun remueve nin conmueve. Como muncho, relaxa. Habrá situación más cómoda que la del galbanosu con llicencia pa culpar a mediu mundu de tolos sos fracasos: ventayes de vivir mirando a la nada. Y otra más: la perfecta certidume de que nada nun merez la pena, de que meyor deleitase nel verde a esfaraguyar nubes col poder de la mente. A lo largo de los sieglos, los asturianos tenemos culpao a cuasi mediu mundu de los nuesos pesares: al tiempu, a los romanos, a los celtes, a los franceses, a los cazurros, a los catalanes, a los gallegos, a los españoles, a Dios, a Felipe V, a Juan Carlos I, a la II República y a los osos.
